Os curros de Oia darán este ano un paso máis na súa posta en valor, converténdose nunha completa experiencia participativa a través da que achegarse a unha das tradicións máis emblemáticas e ancestrais da Serra da Groba. Viaxar ao corazón dos curros será posible nas citas da Valga, Torroña e Mougás, lugares que acollerán a programación de actividades pensadas para todos os públicos, combinando lecer, educación patrimonial e conexión co territorio.
A iniciativa “No corazón dos curros” está impulsada polo proxecto local Amodo Turismo, baixo a marca Saberes do Monte e coa colaboración do Concello de Oia e das asociacións de gandeiros dos curros da Valga e da Groba. A través desta proposta, as persoas participantes poderán coñecer de maneira activa e amena os distintos saberes e o profundo arraigo cultural das rapas das bestas nesta zona.
Os tres curros contarán cun programa común de obradoiros, ao que se sumarán algunhas propostas específicas en cada localización e visitas guiadas.
Obradoiros gratuítos e para todos os públicos
Como cada ano,o curro da Valga abrirá a tempada o segundo domingo de maio (día 10). Entre as 15.00 e as 17.00 horas, antes do comezo da rapa, desenvolveranse obradoiros de calcomanías coas marcas das burras, calco de figuras de petróglifos de cabalos mediante a técnica do frottage e gravado de petróglifos en arxila.
ACTUALIZACIÓN: por mor da chuvia, o curro da Valga quedou aprazado ao 17 de maio. Estes son os novos horarios das actividades:
No caso do curro de Torroña, que terá lugar o 7 de xuño, no mesmo horario ofreceranse as actividades de calcomanías, calco de petróglifos e un obradoiro de elaboración de pequenos coxíns (alfineteiros) recheos de crinas, achegando así materiais e saberes vinculados con esta tradición.
Pola súa banda, o curro de Mougás, previsto para o 14 de xuño, completará a programación con obradoiros de calcomanías, calco de petróglifos e unha actividade singular de elaboración de tinta natural. Ademais de fabricar a tinta tal e como se facía séculos atrás, as persoas participantes poderán practicar a escritura da palabra “curro” empregando as mesmas técnicas e logrando os mesmos acabados que se conservan na documentación histórica.
Todos os obradoiros son gratuítos e abertos a persoas de todas as idades. Para participar será preciso achegarse ao posto de Saberes do Monte instalado en cada curro, podendo acceder ás actividades por orde de chegada e ata esgotar o material dispoñible.
Visitas guiadas aos curros de Oia
Ademais dos obradoiros, a programación tamén incluirá visitas guiadas que, nos casos de Torroña e Mougás, se celebrarán o mesmo domingo de cada curro ás 11.00 horas. Esta actividade ten un custo de 12 euros para persoas adultas (con tarifas reducidas para público infantil) e require inscrición previa a través do teléfono/WhatsApp de Amodo Turismo: 677 783 296.
Paralelamente, Amodo Turismo pon en marcha o “Currolab”, unha iniciativa orientada ao ámbito educativo que levará a tradición dos curros aos centros escolares a través de obradoiros e saídas ao medio natural. O obxectivo é fomentar o coñecemento e a transmisión deste patrimonio cultural entre as novas xeracións desde unha perspectiva activa e vivencial. Para máis información, dispoñibilidade e tarifas do “Currolab” pódese contactar con Amodo Turismo.
